Në tjetër hap i rëndësishëm është ndërmarrë në drejtim të përmirësimit të qasjes së sistemit të drejtësisë për trajtimin e rasteve që përfshijnë të mitur, viktima të dhunës dhe abuzimit seksual. Terre des hommes Shqipëri përfundoi së fundmi një sesion trajnimi gjithëpërfshirës në Vlorë. Kjo nismë u organizua në bashkëpunim me Prokurorinë e Përgjithshme në kuadër të projektit "Të Rinjtë, Të Drejtat dhe Drejtësia", financuar nga Agjencia Austriake e Zhvillimit (ADA) dhe ADC në Shqipëri.
Trajnimi mblodhi njëzet e gjashtë Oficerë të Policisë Gjyqësore, si dhe kordinatorë të subjekteve me status të posaçëm në Prokurorinë e Vlorës, Fierit, Gjirokastrës, Sarandës dhe Beratit. Këta profesionistë u pajisën me teknika të avancuara për kryerjen e intervistave miqësore dhe efektive me të miturit, duke siguruar një qasje më të ndjeshme dhe më mbështetëse në trajtimin e viktimave të reja të abuzimit. Sesioni u drejtua nga Profesor Doktor Ervin Karamuço, ekspertiza e të cilit dha njohuri të vyera mbi sfidat e intervistimit të të miturve, duke nxitur pjesëmarrësit drejt një një kuptimi më të thellë për rëndësinë e adoptimit të metodologjive miqësore për fëmijët në proceset e tyre hetimore.
Pjesëmarrësit shprehën vlerësimin e tyre për trajnimin, duke theksuar rëndësinë e tij me sfidat e tyre të përditshme profesionale. “Metodat dhe teknikat organizative të hetimit janë po aq të rëndësishme sa adresimi i problemeve që hasim në jetën tonë të përditshme, ndaj e konsideroj shumë pozitive pjesëmarrjen në këtë trajnim”, u shpreh një nga prokurorët.